Ny løysing, etablert leverandør

Vi har lang erfaring med å levere og forvalte system for offentleg sektor — integrasjonar mot offentlege fagsystem, tryggleiksarbeid og forvaltning av løysingar over mange år. Vi har mellom anna vore med på å byggje matrikkelen.

Vi leverer åleine

JPro står sjølv for applikasjon, infrastrukturdrift, support og vidareutvikling av SmartFDV. Vi brukar ingen underleverandør og ingen driftspartnar.

Det er eit medvite val. Når ein kommune melder ein feil, går han til det same selskapet som skreiv koden. Det gjev kortare veg frå problem til retting, og det gjer ansvarsforholdet eintydig.

Om at SmartFDV er nytt

SmartFDV er eit nytt produkt, og vi meiner det er rett å vere tydelege på kva det inneber.

Løysinga er bygd frå grunnen av med kommunal FDV som einaste føremål. Ho er ikkje ei tilpassing av eit system laga for ein annan bransje, og ikkje ei vidareføring av ein kodebase frå 2005 med nytt grensesnitt utanpå. Det er grunnen til at mobilbruk, tilgjenge etter WCAG, moderne innlogging via EntraID og ein KI-assistent med reell tilgangskontroll er ein del av fundamentet og ikkje påbygg.

Baksida er like tydeleg: vi har kortare driftshistorikk enn leverandørar som har vore i marknaden i tjue år. Den risikoen handterer vi med bindande milepælar, godkjenningsprøve før produksjonssetjing, full dataeksport frå første dag og ein forpliktande tenestenivåavtale.